Nu le Pa’ thumang a nahlawh peek
—Zomite’ Paunak
“Paita o leh boih… Na lampi kihong tahen o…”
Sumzong dingin a kithawikhia, kumsawm (10) val deuh bek apha pan, Abd-el-Kader, a nu in, sum tang dangkasan (40)a piak khitciang, a kamvaikhakna ahi hi.
“Thumaanlo peuhmah semlo ding nai maw! Zuauthu genlo ding, ahoihlo in gamta limlim lo ding, na theina? Koi dih sin aw, hiah ka mai ah hong kiciam limlim dih ve, cikmah hunin zuauthu gen ngeikei ning, cidih…”
A nu’ sawl bangin, a tapa anu’ mai ah a kiciam khitciang, a nu in, “Na ma kihong hen. Cidamin ki mukik ni maw?”
Tangvalneu pa-a lawmte pawlkhat tawh sumzong dingin a kuankhia ta uh ahi hi. Nithum nilii dingkhawng a paikhiat khit uhciang, lametlohpi-in migilote tawh kitalsik mawk uh hi. Migilote in, hi tangvalneu teng a banban in thusit ngekngek uh hi.
“Sum zong ding hikei ung. Sum neikei ung. Hong hehpih un,” ci-in kitan semsem uh ahih manin migilote in khah deudeu uh hi. Ahi zongin a nunung pen ah a kisit Kader tawh kisai ah hong buaihuai sim pian hi.
“Sum bangzah pua nahia?”
Kader in; “Ka bombi-ipsung ah sum (40) om hi.” Ci-in dawngkik pah lian mawk hi.
Migilote nui ngeingai kawmsa in;
“Kalasa! Uphuai kei vial mahsi! Sum hau zawzeen sicia?” Ci-in nulhnau ngeingai uh hi.
Kader aki thusit sawt sim pian ahih manin, a lawmte lau in a taimang tawh, a bumang tawh, a mah bek om velval laibek hi. Tualeh migilote’ lak ah khat in hong naih phei-in, dongh phakik leuleu hi.
“Sum bangzah pua nahia? Na neih zah a maan takin gen sin aw!”
Kader in zongh, a cihngei bangh mah in, sum (40) bek nei-ingh, a dang nei vetkeng, ci teitei hi. Migilote in umlo uh ahih manin, a makaaipa uh sam uh hi. A makai pipa in;
“Hiah hong paidih sin! Sum bangzah taktak pua nahia? A maantaktak nong gen keileh, hong kaplum ding kahi uh maw” Ci-in, thau khat leh tem khat pei vatvat kawmsa in dongh leuleu hi. Kader zongh lau mahmah ta ahih manin, ling kekeuh bek aa, a-aw kisat kekeuh kawmsa in;
“Hia na nautaang nih te’ kiangah zongh ka genkhin hi. Ka bombi-ip sungah ka nu in hong guansak dangka san tang 40 bek om hi.” Ci teitei hi.
“Heih… tua ahih leh a puanteng suahkhiatsak vo!” Ci-in, migilote bopa in a lawmte sam lualua hi. A lawmte zongh hongpai-in, Daker’ silh le teen teng suah khiatsak didek in, a sit didek vua leh, a ip sungah, sum tang 40 mulian takpi uh hi.
“Ha… bang hangin na puakzah lian takpi mah gen lawmlawm mawk nahia, mihai?” Ci-in, migilote in, hai sa mahmah uh hi. “Hibang tawh hau hak si ni cia, mi dangte hileh apuak zah uh sung pan alang ii lang zong gen lo in seel mang uh hiven!” ci-in nulhnau in nuihsan ziahziah uh hi.
Tua leh Daker in; “Himah hi…ka nu’ kiangah zuauthu gen lo dingin, kiciam khin ka hih hang hi.” A cihtak ciang, migilo makaipipa in Kader naih phei vat hi. Kader zong lau mahmah aa, aci ling kekeuh bek hi. Ahi zongin, Kader lau nabanglo bilbel hi.
Migilobopa in “Aw… himawk maw… nangh na nu’ thu hizah aa a mang hizen maw!! Kei zongh nang bangin ka nu’ thumangin, thumaan thutak nuntaakpih hilengh, hi bangin siat gamtat lo kha mah ding hiveng maw!!” Ci-in, “Naktakpi takin kisik ingh!!” ci khiankhian hi. Tua acih kawmkawmin a khitui tak kekeuh kawmsa in “Kisik ingh, hi kaki sak laitak ahi hetlo kahih lam na gamtatna tawh nong lakkhiat manin lungdam mahmah ingh.” Tua tangvalpa’ sum khempeuh vekin pia kik hi. Migilo makaipipa in a nautangte a vekpi un samin, tangvalpa’ mai ah mawhmaina nget pih hi.
Hi thu pen, a zaknop huai dingin a kiphuak tawm maimai thuleeng khatpeuh ahi ding tawh a kibang hi. Ahi zongin tua bangin a kiphuaktawm thuleeng maimai nahi peuh mah lo hi. Hi tangvalpa, anu’ kam vaikhak bang mah in atuntun na-ah citak in, thumaan thutak nuntaakpih ngiat hi. Hunkhat ciang, Frence te’ ukna sung pan Algeria gam a kaikhia zo pa suak mawkmawk hi. Algeriate’ tangthu sungah tuni dongin mangngei nawnlo aa, kum zalom 19 sung aa’ Algeria gam makai teng khempeuh lak ah a minthang pen khatin kiciamteh khinta hi. Amah pen 1808 kumin suakin 1883 kumin asi ahi hi. Ahi zongin, anu’ thu amanna huhau bekbekin, mi lawhcing mahmah khat suak khinta ahih manin tuni dong amin amang nawnlo ahi hi.
Hih Article pen ‘Thapiakna Thului-20’ sung pan hi aa, Zomi Daily website ah zong kisuaksak ahih manin tua mun pan na sim nop leh himun na mek in.
