Pope Francis tuni kivuita. A dam sungin a thu gente’ sung pan ka lunglut tampi a omte’ sungah, “Pasian pen mitphial siamte bang daan hilo” a cih thu zong kihel hi. Tua acih laitak, amah pen apan mun alet zawh kum khat aphak sung 2014 kum hi-in, Pontifical Academy of Sciences ah agen thu hi aa, evolution leh big bang te pen Piancilna thute tawh kituakin, Pasian pen mitphial siamte in ciang peuh lekin a utut uh apian sak ziauziau dan hilo hi (God is not a magician with a magic wand), aci ahi hi. Cihnopna ah mitphial siamte’ nasep bangin Pasianin a lum a let in na sem gawpmang lo in amau mun ciat ah ahi dimdiam dingin abawl ahi hi, acinuam ahi hi. Hilai ah aphawk huai thu khat pen, Pasian mitphial siamte daan hilo, cih ciangin Pasianin nalamdang bawl theilo, cihna hilo hi (God is Not a Magician ≠ God Can’t Do Miracles). Hithu pen a saang theilo mi tampi a om hi aa, a saang thei zong tampi tak mah a om hi leuleu hi. A saang theite’ lam pang pan en lehang, Pian. 1:1 sunga’ a kipatcilin Pasianin vantung leh leitung apiang sak hi, acih lian pen ‘big bang’ hipah aa, tua panin a kizom suksuk ni guk sung pian saknate pen, ‘evolution’ hi leuleu hi, a ci thei ding uh ahi hi. LST leh Big bang ‘Big bang’ pen a tomin, tuma kum billion 13.8 kiim lai-in, a tha khauh mahmah khuavak khat panin khuvaannuai tha khat thu in piang hi cih muhna hi aa, tua thu pen Pasianin a kipat cilin vantung leh leitung apian sakna thu tawh kituak hi, cih theih ding hi. Bang hang hiam cih leh, Pian 1:1-3 sunga vantung leh leitung pen mel aneilo vanpi, leipi leh khuavak ahi hi. Pian. 1:5 sungah tua bangin Pasianin khuvainuai apiansak ni pen, ‘ni khat ni’ ci-in kiciamteh hi. Himun ah, tua ni khat pen ‘nitak hong bei-in zingsang hong tunga, ni khat ni ahi hi, ci-in kigelh ahih manin, tulaitak aa ih zat nai 24 sung ding tawh kibangh mahmah hi. Ahi zongin, tua ‘ni khat ni’ cih kammal pen Hebbrew ah ‘yom echad’ in kigelh aa, a ni masa ni cihnopna ‘yom rishon’ in kigelhlo hi. Tua ‘ni’ cihna ‘yom’ pen a kizoppih thu tawh kizui-in tua hun pan tua hun cih lian ciangtan a omlo hun huampi khat genna in zong kizang thei hi. Thamlo in, Pian. 1:14-19 sungah a ni 4 ni ciangin ni kibawl pan ahih manin, Pian. 1:5 sunga’ pen tu hun aa sun leh zan khat bang danin ngaihsunlo ding hile hang ahithei ding thu suak hi. Tua ahih manin, tua piancilna nite asawt hun pen tu hun aa ni khat tawh kibang hi, cih theih lianlo suak hi. Thamlo in, Pasianin ni khat acih ciang, kum bangzah hiam khat zong agennuam hi thei zelzel hi (Late 90:4; 2 Peter 3:8). Tua hi aa, kam dang khatin ci lehang, tua piancil ni pan kipan ‘evolution’ a kici damdam aa kikheelna a kipan pah ahi hi, cih ding hi ding hi. LST leh Evolution Piancil Ni 1ni: Planck Epoch Ahun: tuma kum billion 13.8 kiim Thupiang: big bang- a thahat mahmah khua vak puak khapna kipan; LST-mel aneilo vanpi, leipi leh khuavak Pasianin bawl (Pian 1:1-3). Piancil Ni 2ni: Hadean Eon Ahun: tuma kum billion 4.5 kiim Thupiang: evolution- khuahun leh tuipi liante piang; LST-van khumpi-in tui le tui kikhen sak (Pian 1:6-8). Piancil Ni 3ni: Proterozoic Ahun: tuma kum billion 1 kiim Thupiang: evolution-leitang, singkung piang; LST-leitung piang, singkung piang (Pian 1:9-13). Piancil Ni 4ni: Phanerozoic Eon Ahun: Tuma kum million 600 kiim Thupiang: evolution- nuntakna bulpi tuamtuamte piang; LST- ni, kha, aksi piang (Pian 1:14-19). Himun ah big bang tung tawnin hileh, ni pen om khin thamin, ahi zongin LST tung tawnin hileh, tu’n ni piang pan leuleu hi. A lunglut huai ah; LST genna-ah ni apian ma in singkung lopa piang masa aa, ahi zongin singkung lopate nitaang lo in nungta theilo citciat hi. Tua ahih manin, Piancil ani 2ni-in, ni om khin dingin up huai aa, tua tua pen Piancil ni 4ni ciangin, ni a kicianin apiang khia (a kimu khia hi ding hi). Piancil Ni 5ni: Mesozoic Era Ahun: tuma kum million 540 kiim Thupiang: evolution- tuisung ganhing, leh vasate dinosaurs nam khat pan piang; LST- tuisung ganhingte leh vasate piang (Pian 1:20–23). Piancil Ni 6ni: Cenozoic Era Ahun: tuma kum million 65 kiim pan tu kikaal Thupiang: evolution-nawine ganhing nam leh mihingte piangin, oxgen (65%), carbon (18%), hydrogen (10%), nitrogen (3%), calcium (1.5%), phosphorus (1%), potassium (0.25%), sulfur (0.25%), leh a dang ion, zinc cih te (<1%) teng tawh ki bitphuah. Mihingte pen nuntakna anei adang khat panin apiang to hi-in, thu ngaihsut theihna, Pasian tawh kizop theihna, kam dang khatin hileh, Pasian’ hu ngah uh hi. LST-ganhing leh mihingte piang (Pian 1:24–31). Pasianin mihingte leivui pan bawlin a sungah ahu muam (Pian 2:7). Thamlo in, leivui pan kibawl, leivui ah ciah kik ding cih thu ahih manin, mihing pumpi pen den aa mipilte’ muhna mah tawh a kituak ding suak, gentehna: oxgen = nuntakna hu (Pian 2:7), carbon = leivui (Pian 3:19), hydrogen = nuntakna tui (John 4:14), nitrogen = guh le taang (Job 10:11), calcium = thagui leh sazang (Ezk. 37:5-6), etc. Hih a tunga thu luan zia a pomte pen theistic evolutionists cih khawngin kithei-in, amau sa’an zia ah LST in hong theih saknop abulpi pen mihingte bang hangin hong kipiang sak ‘why’ cih thu hi aa, science leuleu in koi danin mihingte kipiang ‘how’ cih thu ahi hi, ci-in saang uh hi. Tu aa dan hileh, Pasian’ bawlsa leh a sepsa nate pen mipilte in damdamin a mu khia toto uh hi aa, mipilte’ muh khiat thute pen LST sungah a om khin vive hizaw hi, kipelh cih bang omlo hi, cih ding ahi hi. Nang ee, koi danin na saang?