Hih Khrih Tuallenna Mun Siangthote cih laibu apian theihna thu pen;

Jesuh Khrih gumpa leh honpa in kasaan khit a kipan nuntak tawntungna hong pia tua Jesuh’ tuallenna mun le mualte ka mitin mu in, ka khut tawh lawng kha in, ka khe ngiat tawh ka sik khak ding pen ka lunggulh mahmah thu khat ahi hi.

Tua ka lunggulhna Pasianin hong thu kimpih hi ding hiven, hun khat ciang Postdoctoral Research sem dingin Israel, The Hebrew University of Jerusalem ka tung hi. Kei pen Lai Siangtho sang a kah ngei kahi kei aa, Lai Siangtho sangkah dingin a tungzong kahi kei hi. Ahi zongin, hun awng ka ngah sunsun ciangin, Lai Siangtho simin, ka muhnop leh ka sikkhak nopna munte ka zin kawikawi zel hi. Pasian’ hehpihna tawh Israel gam sung a lu pan a taw dong mah ka khin aa, tunnop diakna leh muhnop diakna om nawnlo dongin sik kawikawi kahih manin, ka lungkim mahmah hi.

Tua bangin ka vak suk ka vak toh na pan, ka zak ngeiloh leh ka theih ngeiloh thu tampi ka tuah khak om hi. Thamlo in, mun khatkhatte in ka lungsim hong zo mahmah in, a thakin Pasian’ hopihna ka ngah hun zong tam veipi om aa, kei kia zum nuih zel, khitui nul zel cih bangin ka om hun tam mahmah hi. Tua bang thute hih laibu tung tawnin a gen khia kik thei suak kahih manin ka kipaak mahmah hi. Banghang hiam cih leh, tua thute in nang zong na lungsim hong lawng ding aa, Jesuh Khrih’ hong itna thu a thakin phawkin, Pasian’ hopihna-a thakin na zakna suakin, Pasian’ vangliatna zong a thakin na muhna suak ding cih, upna leh lametna ka neih hang ahi hi.